Rusiyanın ən varlı deputatlarından biri öldü

Dövlət Dumasının Vahid Rusiya partiyasından olan deputatı Nikolay Bortsov 77 yaşında vəfat edib.

Teleqraf.com xəbər verir ki, Nikolay Bortsov 2003-cü ildən Dövlət Dumasının deputatı olub.

“Forbes”ə görə, millət vəkili ən zəngin rusiyalılar siyahısındadır. 2021-ci ildə jurnal onun sərvətini 550 milyon dollar qiymətləndirib. Bortsovun əsas kapitalını onun və tərəfdaşlarının Lebedyanski şirə zavodundakı (“Ya”, “Fruktovy Sad” markaları) 75,5%-lik payını “PepsiCo”ya satdıqdan sonra əldə edilən vəsait təşkil edir.

2021-ci ildə “Forbes” Bortsovu ən yüksək gəlirli 100 dövlət işçisi sırasına daxil edib.

Rusiyanın Ukraynaya genişmiqyaslı müdaxiləsi səbəbindən Nikolay Bortsov ABŞ və digər Qərb ölkələrinin sanksiyaları altına düşüb. Ukraynada Bortsov tanınmamış DXR və LXR-in müstəqilliyini tanıdığına görə qiyabi olaraq 15 il həbs cəzasına məhkum edilib.

Rusiya Federasiyası Mərkəzi Seçki Komissiyasının məlumatına görə, Nikolay Bortsovun seçildiyi birmandatlı seçki dairəsi üzrə Dumaya əlavə seçkilər sentyabr ayında keçiriləcək.