Rus ordusunun hücumu dayandırıldı – Mövqeləri darmadağın edildi

Rusiya qüvvələri əsas səylərini Liman, Baxmut, Avdiv və Marin istiqamətlərində cəmləşdirib. Gün ərzində bu istiqamətlərdə 24 toqquşma olub.

Teleqraf.com xəbər verir ki, bu barədə Ukrayna Silahlı Qüvvələrinin Baş Qərargahı məlumat yayıb.

Rus ordusunun Liman istiqamətində Spirniyə hücum əməliyyatı uğursuz alınıb. Luqansk vilayətinin Biloqorivka və Donetskin Ozerne yaşayış məntəqələrinə aviazərbələr endirilib.

Rusların Baxmut istiqamətində Orixovo-Vasilivkaya hücum əməliyyatları da nəticəsiz bitib. Avdiv şəhəri isə aviazərbələrə məruz qalıb.

Ukrayna ordusu Marin şəhəri ərazisində Rusiyanın çoxsaylı hücumlarının qarşısını alıb.

Ruslar Şaxtyor istiqamətində Novomixailiv və Uqledarda hücum əməliyyatları keçirsələr də, uğursuzluqla nəticələnib.

Bundan başqa, son sutka ərzində Ukrayna aviasiyası Rusiya canlı qüvvələrinin cəmləşdiyi ərazilərə 10 hava zərbəsi endirib və 1 zenit-raket kompleksi vurulub. Həmçinin rus ordusuna məxsus “Ka-52” helikopteri, İran istehsalı 3 “Şahid” dronu və 7 kəşfiyyat PUA-sı məhv edilib.

Həmçinin Ukraynanın raket qoşunlarının və artilleriya bölmələri 2 idarəetmə məntəqəsini, 4 zenit-raket kompleksini, şəxsi heyətin və hərbi texnikanın cəmləşdiyi 2 ərazini, 2 sursat anbarını vurub.