Urmiya gölü quruyur: Tehran niyə göz yumur? - Ağlasığmaz niyyət

“Tehran məqsədyönlü şəkildə Urmiya gölünün ekoloji problemlərinin həlli məqsədilə beynəlxalq qurumların və ekspertlərin rəyini də qulaqardına vurur”.

Teleqraf.com xəbər verir ki, bunu politoloq Elxan Şahinoğlu deyib.

Ekspert Urmiya gölünün quruması nəticəsində bölgədə ekoloji fəlakət yaşandığını bildirib:

“Bir ölkənin “dərin dövlət”i öz ərazisində ekoloji fəlakətin böyüməsində niyə maraqlı olsun? Urmiya gölü sürətlə quruyur, əkinçiliyə və heyvandarlığa zərər dəyib, quruma nəticəsində duz qasırğalarının ətraf mühitə, o cümlədən Türkiyə və Naxçıvana mənfi təsiri olacaq.

Deyək ki, Urmiya gölünün quruması İranın “dərin dövlət”inin vecinə deyil, əksinə Güney Azərbaycana, Azərbaycana və Türkiyəyə ekoloji problemlərin yaranmasından faydalanmaq istəyirlər, ancaq axı bunun bir ucu özlərinə də toxunacaq. Müxtəlif hesablamalara görə, duz qasırğası gölün 500 kilometr radiusunda yaşayan on milyonlarla sakinə təsir edəcək.

İranda hər yeni gələn prezident Urmiya gölünün problemini həll edəcəyini vəd edir, bir az keçir, vədini yaddan çıxarır və ya “dərin dövlət” ona izah edir ki, bu məsələyə qarışma. Bu səbəbdən Tehran Urmiya gölünün ekoloji problemlərinin həlli məqsədilə beynəlxalq qurumların və ekspertlərin rəyini də qulaqardına vurur”.