Ölkəyə hərbi müdaxilə qərarı verildi - Ərdoğandan təpki

Türkiyə Prezidenti Rəcəb Tayyib Ərdoğan hərbçi çevrilişin baş verdiyi Nigerdəki gəlişmələr barədə danışıb.

Teleqraf.com xəbər verir ki, dövlət başçısı bu ölkəyə hərbi müdaxilə qərarının doğru olmadığını deyib.

“İndiyədək heç bir həll yolu tapılmayıb. Hazırda Xarici İşlər Nazirliyimizlə burada rolumuzu necə oynaya biləcəyimizə diqqət yetiririk, İnşallah Nigerdə ​​də bir həll tapmalıyıq. Ümid edirəm ki, dost və qardaş ölkə Niger ən qısa zamanda konstitusiya quruluşunun bərpasına və demokratik idarəçiliyə nail olacaq. Qərbi Afrika Dövlətləri İqtisadi Birliyinin (ECOWAS) Nigerə hərbi müdaxilə qərarını doğru hesab etmirəm. Bu qərardan sonra Mali və Burkina Faso da xəbərdarlıq edib ki, Nigerə hərbi müdaxilə onlara müharibə elan etməkdir. Nigerə hərbi müdaxilə qeyri-sabitliyin bir çox Afrika ölkələrinə yayılması demək olardı. Ümid edirəm ki, Nigerdə ​​sülh və sabitlik tezliklə bərpa ediləcək. İnanıram ki, Niger xalqı ən qısa zamanda demokratiyaya sahib çıxacaq və seçkilərə gedəcək. Türkiyə olaraq dost və qardaş Niger xalqının yanında olmağa davam edəcəyik”, - Ərdoğan vurğulayıb.