HƏMAS-dan Türkiyə tələbi: ABŞ və İsrail qəbul eləmədi

Fələstin HƏMAS Hərəkatı İsraillə imzalanacaq atəşkəs razılaşmasında Çin, Rusiya və Türkiyənin qarant olmasını tələb edir.

Teleqraf.com xəbər verir ki, bu barədə İsrail mətbuatı məlumat yayıb.

İddiaya görə, HƏMAS-ın İsraillə atəşkəs təklifinə verdiyi cavabda tələblərində dəyişikliklər də yer alıb. Xəbərdə HƏMAS-ın Çin, Rusiya və Türkiyənin girovların azad edilməsini ehtiva edən atəşkəs razılaşmasının qarantı olmasını tələb etdiyi bildirilib.

Məlumatda tələbin həm ABŞ, həm də İsrail tərəfindən rədd edildiyi vurğulanıb.

Həmçinin HƏMAS-ın tələblərinə daimi atəşkəs üçün yenilənmiş vaxt cədvəli və İsrail qoşunlarının Qəzza zolağından, o cümlədən Rəfah və Misir-Qəzza sərhədi boyunca yerləşən Filadelfiya dəhlizindən çıxarılması kimi məsələlərin daxil olduğu qeyd edilib.