Latviya aviaşirkəti Fransadakı qəzadan sonra yeni qərar qəbul edib

Fransada çərşənbə axşamı baş vermiş təyyarə qəzasından sonra Latviyanın “AirBaltic” milli aviaşirkəti yeni təhlükəsizlik qaydalarının tətbiq edilməsi barədə qərar qəbul edib.

Trend-in RİA Novosti-yə istinadən verdiyi məlumata görə, şirkətin vitse-prezidenti Yanis Vanaqs jurnalistlərə bildirib ki, bundan sonra şirkətin hava reyslərində pilot heç zaman kabinədə tək qalmayacaq: “Bizim şirkətimiz qərar qəbul edib ki, bundan sonra pilot kabinəsində daim ən azı iki pilot olsun. Əgər pilotlardan biri hansısa hallarda kabinəni tərk etmək məcburiyyətində qalarsa, stüardessalardan biri kabinədə olacaq”.

Onun sözlərinə görə, qərar artıq qüvvəyə minib və şirkətin bütün təyyarələrinin heyəti üçün məcburidir.

Xatırladaq ki, "Germanwings" aviaşirkətinin "Airbus A320" tipli təyyarəsi çərşənbə axşamı Alp dağlarında qəzaya uğrayıb. Son məlumatlara görə, Barselonadan Düsseldorfa uçan laynerin qəzaya uğraması nəticəsində 150 nəfər həlak olub. Təyyarədə Almaniya, İspaniya və Türkiyə vətəndaşları olub.