Həsən Ruhanidən ABŞ-a xəbərdarlıq

İran prezidenti Hassan Ruhani ABŞ məhkəməsinin İrana məxsus dondurulmuş 2 milyard dollara yaxın vəsaiti saxlamasını açıq-aşkar oğurluq və İran xalqına qarşı düşmənçiliyin davam etdirilməsi kimi qiymətləndirib.

Teleqraf.com-un "Röyters"ə istinadən verdiyi məlumata görə, o bunu Nazirlər Kabinetinin iclasında deyib.

Ruhani qeyd edib ki, hökumət xalqın təmsilçisi kimi onun hüququnun qorunması üçün əlindən gələni edəcək. Dünyanın hansısa bir yerində məhkəmənin İran xalqının hüququ və əmlakı barəsində qərar çıxarması tamamilə qanunsuz və beynəlxalq hüquq normalarına ziddir.

ABŞ-ın Ali Məhkəməsi ötən həftə Tehrana məxsus 2 milyard dolların İranın əli olduğu terror qurbanlarının ailələrinə ayrılması barədə qərar çıxarıb.

Söhbət 1300-dən çox amerikalıdan gedir.

Onların yaxınları 1983-cü ildə Beyrut, 1996-cı ildə isə Səudiyyə Ərəbistanında törədilən partlayışlarda həlak olub. İran bu terror aktlarında əli olmadığını deyir.