“Günəşli” yatağında yanğının söndürülməsinə BP də kömək edib

Günəşli” yatağındakı 19-cu stasionar dərin dəniz özülündə 71 saylı quyuda təmir işləri aparılarkən baş vermiş qaz təzahürü barədə məlumat “Azərbaycan Xəzər Dəniz Gəmiçiliyi” Qapalı Səhmdar Cəmiyyətinə daxil olan kimi təxirəsalınmaz tədbirlər görülüb.

Teleqraf.com-un xəbərinə görə, bu barədə sözügedən qurum məlumat yayıb.

Məlumatda bildirilir ki, SOCAR və Fövqəladə Hallar Nazirliyi ilə daimi əlaqə saxlayan “Azərbaycan Xəzər Dəniz Gəmiçiliyi” tərəfindən tələb olunan bütün gəmilər hadisə yerinə mobilizasiya olunub və dənizdə aparılan əməliyyatların koordinasiyası təmin edilib. Hadisə yerində Gəmiçiliyin “Nefteqaz-64” və Nefteqaz-10” gəmilərində qərargah yaradılıb, gəmilərin işi koordinasiya olunub.

Qəzanın aradan qaldırılmasında və saat 18-dən sonra başlamış yanğının söndürülməsinə Azərbaycan Xəzər Dəniz Gəmiçiliyinə (AXDG) məxsus “Nefteqaz-10” və “Nefteqaz-64”, AXDG-yə məxsus, FHN tərəfindən idarə olunan “Vixr-5” və “Vixr-7” gəmiləri ilə bərabər, BP Azərbaycan şirkətinin rəhbərliyinin razılığı və köməkliyi ilə həmin şirkətə xidmət göstərən gəmilər də cəlb edililib.

Belə ki, Xəzərdə ən böyük yedək-təchizat gəmisi olan Gəmiçiliyin “Lənkəran” gəmisi, AXDG - BUE Caspian Alyansının həmin şirkətə xidmət göstərən “Topaz Dignity”, “Caspian Protektor”, “Caspian Voyager” gəmiləri və onların heyətləri qəzanın aradan qaldırılmasında xüsusi rol oynayıb.

Səhər saatlarında alov söndürüldükdən sonra özüldə təmir-bərpa işləri başlayıb.

Hazırda Gəmiçiliyin G.Şıxlinski və Şirvan-2 kran gəmiləri, Nefteqaz-64, Aura, Om təchizat-yedək gəmiləri, AXDG-yə məxsus, FHN tərəfindən idarə olunan “Vixr-5” və AXDG - BUE Caspian Alyansının “Caspian Server” gəmiləri qəzanın nəticələrinin aradan qaldırılması ilə əlaqədar aparılan işlərə cəlb olunub.

İlhamə ƏBÜLFƏT