21 Mart 2017 16:41
467
12 Punto 14 Punto 16 Punto 18 Punto

Azərbaycanın Vyetnamdakı Səfirliyi və Vyetnam-Azərbaycan Dostluq Assosiasiyasının birgə təşkilatçılığı ilə ölkənin ən böyük milli qoruqlarından biri olan Ba Vi milli parkında Novruz bayramı münasibətilə şənlik keçirilib.

Teleqraf.com-un xəbərinə görə, bu barədə rəsmi informasiya agentliyi olan "Azərtac" məlumat yayıb.

Məlumatda bildirilir ki, tədbirdə assosiasiya üzvləri, Vyetnamın dövlət və özəl strukturlarında, o cümlədən Kommunist Partiyası, parlament, Ədliyyə Nazirliyində, “PetroVietnam”, “VietsovPetro” şirkətində çalışan Azərbaycan ali təhsil ocaqlarının 150-ə yaxın məzunu, onların ailə üzvləri, KİV nümayəndələri iştirak edib.

Azərbaycanın Vyetnamdakı səfiri Anar İmanov Azərbaycan dövlətinin Novruz adət-ənənələrinin qorunması ilə yanaşı, dünyada tanıdılmasına böyük önəm verdiyini vurğulayıb, Novruz bayramının UNESCO-nun Qeyri-Maddi Mədəni İrs Siyahısına daxil edildiyini, Azərbaycanın təşəbbüsü ilə 2010-cu ildə BMT Baş Məclisində 21 martın Beynəlxalq Novruz Günü elan edilməsi ilə bağlı qətnamənin qəbul olunduğunu bildirib.

Vyetnam parlamentinin deputatı, Elm və Texnologiyalar Assosiasiyaları Birliyinin vitse-prezidenti, Vyetnam-Azərbaycan Dostluq Assosiasiyasının sədri Nqiem Vu Xay Azərbaycan ali təhsil ocaqlarının vyetnamlı məzunları adından Azərbaycan xalqını Novruz bayramı münasibətilə təbrik edib.

Nqiem Vu Xay illər ötməsinə baxmayaraq, vyetnamlı məzunların hər zaman Azərbaycanı sevdiklərini, həyatda qazandıqları uğurlara görə ölkəmizə borclu olduqlarını deyib.

Sonra Novruz adət-ənənələrini əks etdirən video nümayiş etdirilib, milli mətbəx nümunələrindən ibarət ziyafət verilib.

Tədbir vyetnamlı məzunların ifasında konsert proqramı ilə davam edib. Şənlik iştirakçıları tonqal ətrafında yallı rəqsini ifa ediblər.


Müəllif:

Oxşar xəbərlər