Səməd Seyidov: “Məqsəd Avropa İttifaqı ilə əlaqələrə mane olmaq idi”

Milli Məclisin beynəlxalq əlaqələr və parlamentlərarası münasibətlər komitəsinin sədri Səməd Seyidov parlamentdə iki vacib məsələ ilə bağlı çıxış edib.

Teleqraf.com xəbər verir ki, komitə sədri fevralın 6-da prezident İlham Əliyevin Brüsselə səfər etməsi və Avropa İttifaqının rəhbərliyi ilə keçirdiyi görüşlər haqda danışıb:

“Fevralın 6-da prezident İlham Əliyev Brüsselə səfər edib. Səfərin əsas məqsədi Avropa İttifaqı rəhbərləri ilə görüşlər keçirib strateji əməkdaşlıq haqda yeni sazişlə bağlı müzakirələr aparmaq idi. Avropa İttifaqının tarixində ilk dəfədə olaraq “Şərq Tərəfdaşlığı Proqramı”dan ayrıca olaraq bir dövlət Avropa İttifaqı ilə saziş imzalamaq iradəsini ortaya qoyub. Və bu təşəbbüs Avropa İttifaqı tərəfindən dəstəklənib. Avropa İttifaqı rəhbərliyi Azərbaycan-Avropa İttifaqı arasında münasibətlərin yeni mərhələyə qalxmasını dəstəkləyib. Təbii ki, Avropa İttifaqı rəhbərliyi Azərbaycan prezidentinin bu təşəbbüsünü dəstəkləməklə ölkəmizin ərazi bütövlüyü, suverenliyini dəstəkləməsini ortaya qoyub. Həmçinin Azərbaycanın enerji layihələri də müzakirə mövzusu olub”.

Səməd Seyidov əlavə edib ki, Azərbaycan rəhbərliyinin Avropa İttifaqı ilə danışıqlar aparması bəzi ünsürləri narahat edib: “Fevralın 6-da prezidentin səfəri ərəfəsində Avropa Parlamentinin cəmi 2-3 deputatının təşəbbüsü ilə Azərbaycanla bağlı müzakirələr keçirmək istəyibər. Burada məqsəd nə idi? Prezident İlham Əliyevin səfərini əngəlləmək və Azərbaycan-Avropa Birliyi münasibətlərinə mane olmaq. İkincisi, yeni seçilən Avropa Parlamentinin deputatlarının Azərbaycana qarşı fikirlər söyləməsinə nail olmaq. Qeyd edim ki, onlar nə birinci, nə də ikinci məqsədlərinə nail ola bildilər. Bu təşəbbüs Avropa Parlamentinin tarixində utancverici hal kimi qalacaq”.

Nemət