Bakıda və regionlarda ağır qəzalar: 5 ölü

Bakının Qaradağ rayonunda ağır yol-nəqliyyat hadisəsi baş verib.

Teleqraf.com xəbər verir ki, Sahil qəsəbəsində Balakən rayon sakini İlham Ağayev idarə etdiyi “Mercedes” markalı avtomobili yolun kənarında dayanmış Şəki şəhər sakini Murad Səfərova məxsus “Ford” markalı avtomobilə çırpıb, sonuncu avtomobil isə qarşıda dayanan Ağstafa rayon sakini Tural Mustafayevi vurub.

Hadisə nəticəsində xəsarət alan Tural Mustafayev xəstəxanaya yerləşdirilsə də, orada ölüb.

Daha bir yol qəzası paytaxtın Sabunçu qəsəbəsi ərazisində qeydə alınıb. Bakı şəhər sakini Səxavət Əliyev idarə etdiyi “QAZ-3110” markalı avtomobillə yolu keçən 30-35 yaşlı kişini vurub. Xəstəxanaya yerləşdirilən həmin şəxs sentyabrın 5-də orada ölüb.

Oxşar hadisə paytaxtın Nizami rayonunun Q.Qarayev prospektində də baş verib. Bakı şəhər sakini Abbas Muradov idarə etdiyi “Mercedes” markalı avtomobillə yolu keçən paytaxt sakini Şahmar Mehrəliyevi vurub. Xəstəxanaya yerləşdirilən piyada orada ölüb.

Bundan başqa, Gədəbəy rayonunun Arıqdam kəndində də yol-nəqliyyat hadisəsi baş verib. Rayon sakini Cavid İsgəndərov idarə etdiyi “Hyundai” markalı avtomobillə yolu keçən həmyerlisi 7 yaşlı İlham Hüseynlini vurub. Nəticədə xəstəxanaya yerləşdirilən uşaq orada ölüb.

Goranboy rayonunun Qızılhacılı qəsəbəsində Şəki rayon sakini Elnur Əliyev idarə etdiyi “Mercedes” markalı avtomobillə yolu keçən Naftalan şəhər sakini Məmməd Qarayevi vurub və idarəetməni itirdiyindən qarşıdan gələn Suma Behbudovanın idarə etdiyi “Vaz-21011” markalı avtomobillə toqquşub.

Nəticədə M.Qarayev hadisə yerində ölüb.