Çoxmərtəbəli binada yanğın: Nazir müavinindən açıqlama – Yeni

Yanğın haqqında məlumat Fövqəladə Hallar Nazirliyinin qaynar xəttinə 12:10 radələrində daxil olub. Təxminən 3 saatdan artıq davam edib. Yanğın tam söndürülüb.

Bunu fövqəladə hallar nazirinin müavini Etibar Mirzəyev deyib.

O bildirib ki, hadisə yerinə 25 texnika, 100-ə yaxın canlı qüvvə cəlb olunub: "Yanğının uzun davam etməsinin səbəbi su qıtlığı ilə əlaqədardır. Hazırda şəhərdə tıxacdır. Bu iri texnikaların yanğın yerinə yaxınlaşmasına çətinlik törədirdi. Yanğının baş vermə səbəbləri araşdırılır. Yanğın 18-ci mərtəbən yuxarıda baş verib. Xəsarət alan yoxdur. Bəzi informasiya vasitələrində yazılır ki, kimsə özünü binadan atıb. Bu məlumat tam əsassızdır və yalandır. Yanğınsöndürənlər arasında da zəhərlənən olmayıb" (APA).

Bakıda hündürmərtəbəli binada baş verən yanğın söndürülüb.

1 saylı Kliniki Tibbi Mərkəzin Toksikologiya şöbəsinin müdiri Azər Maqsudov Trend-ə bildirib ki, hadisə nəticəsində bir nəfər tüstüdən zəhərlənib.

Yanğının baş vermə səbəbləri araşdırılır.

***

Bakıda hündürmərtəbəli binada baş verən yanğın lokallaşdırılıb.

Yanğın binanın çölünü əhatə edib. Binanın içərisinə yanğın keçməyib.

Hazırda yanğınsöndürənlər tərəfindən yanğının tam söndürülməsi istiqamətində tədbirlər davam etdirilir.

***

Fövqəladə Hallar Nazirliyi Bakıda hündürmərtəbəli binada baş verən yanğınla bağlı məlumat yayıb.

Teleqraf.com-un xəbərinə görə, məlumatda deyilir ki, Bakı şəhəri, Xətai rayonu ərazisində yerləşən çoxmərtəbəli binada yanğın baş verib.

Hazırda Fövqəladə Hallar Nazirliyinin Dövlət Yanğından Mühafizə Xidmətinin yanğın bölmələri hadisə yerindədir.

Yanğınsöndürmə işləri barədə əlavə məlumat veriləcək.

***

Yanğın baş verən əraziyə Fövqəladə Hallar naziri, general-polkovnik Kəmaləddin Heydərov gəlib.

Yanğın əhatə dairəsi genişlənib.

Hazırda yanğının söndürülməsi istiqamətində tədbirlər davam etdirilir.

***

Yanğın baş verən əraziyə Fövqəladə Hallar nazirinin müavini, general-leytenant Etibar Mirzəyev gəlib.

***

Yanğın baş verən ərazidə yollar bağlanıb.

Təhlükəsizlik tədbirlərinin görülməsi məqsədi ilə Heydər Əliyev prospektindən Yusif Səfərov küçəsi istiqamətində əsas və köməkçi yol bağlanıb.

Yanğın binanın 13, 14, 15, 16, 17, 18, 19 və 20-ci mərtəbələrində müşahidə olunur./APA/

***

12:36

Bakıda hündürmərtəbəli binada yanğın baş verib.

Teleqraf.com xəbər verir ki, yanğın binanın üst mərtəbəsində müşahidə edilib.

Hadisə yerinə Fövqəladə Hallar Nazirliyinin 4 yanğınsöndürən maşınının gəldiyi xəbər verilir.