“İbrahimbəyov Azərbaycana qayıda bilər”

Ziyalılar Forumu Rafiq Əliyevin qayıtmasını gözləyir

“Ziyalılar Forumunun yenidən fəaliyyətə başlaması yönündə danışıqlar gedir”.

Bu sözləri Teleqraf.com-a açıqlamasında Ziyalılar Forumunun və “El” Hərəkatının Qurultaya Hazırlıq üzrə Təşkilat Komitəsinin üzvü Eldəniz Quliyev deyib.

Onun sözlərinə görə, akademik Rafiq Əliyev Azərbaycana qayıdandan sonra Forum üzvlərinin toplanacağı vaxt bəlli olacaq. Forumun işlərini də R.Əliyev koordinasiya edəcək.

O qeyd edib ki, Forum yenidən fəaliyyət göstərəcəksə, orada təmsil olunan insanların bir strategiyası və ali məqsədi olacaq: “Ondan sonra geniş söhbət etmək mümkün olacaq”.

E.Quliyev Ziyalılar Forumunun yaradıcısı Rüstəm İbrahimbəyovla mütəmadi əlaqə saxladıqlarını söyləyib: “Mən də, Cəmil Həsənli də onunla tez-tez telefonla danışırıq. O, özü də Ziyalılar Forumunun fəaliyyətində maraqlıdır. Rüstəm İbrahimbəyov yaxın gələcəkdə Azərbaycana qayıda bilər”.

O, “El” Hərəkatının Qurultaya Hazırlıq üzrə Təşkilat Komitəsinin sədri Eldar Namazovun Azərbaycanda olmadığını, lakin qurultaya hazırlıq getdiyini bildirdi: “Yaxın aylarda “El” Hərəkatının qurultayının keçiriləcəyi gözlənilir. Eldar müəllim intensiv olaraq bu işlərlə məşğuldur”.

Qeyd edək ki, Ziyalılar Forumu 2012-ci ildə yaranıb. Ötən il prezident seçkilərində Forumun bir sıra üzvləri Milli Şuraya qoşulduğundan Ziyalılar Forumunun işi dayanmışdı.

Nərgiz