Sumqayıtda polis avtoxuliqanlıq edən sürücünü saxladı

Sumqayıtda avtobus sürücüsü Quluyev Ceyhun Ələmqulu oğlu avtoxuliqanlıq edib.

Teleqraf.com xəbər verir ki, işıqforun qırmızı işıqda keçən avtobus sürücüsü yol polisinin “Saxla” əmrinə tabe olmayıb və hərəkəti davam etdirib.

Sumqayıt Dövlət Yol Polisi əməkdaşları şəhərin mərkəzi hissəsində sürət həddini aşaraq hərəkət edən avtobusu maneə ilə saxlayıblar. Sürücü və konduktor Sumqayıt Şəhər Polis İdarəsinin 5-ci Polis Bölməsinə gətirilib.

Sürücünün nəqliyyat vasitəsini sərxoş idarə etdiyi bildirilir.

Məlumata görə, o, hadisə zamanı yol polisinin avtomobilini də əzib.

Faktla bağlı Sumqayıt Şəhər Polis İdarəsinin 5-ci Polis Bölməsi tərəfindən araşdırma aparılır.