Bu ərazilərdə yanğının yayılmasının qarşısı alındı

Zaqatala rayonunun Yuxarı Tala kəndi istiqamətindəki yanğının yayılmasının qarşısı alınıb.

Bu barədə Teleqraf.com-a Fövqəladə Hallar Nazirliyindən məlumat verilib.

Bildirilib ki, hazırda tüstü mənbələrinin söndürülməsi üzrə tədbirlər davam etdirilir. Eyni zamanda Qəbələ rayonunun Tikanlı kəndi və Oğuz rayonunun Baş Daşağıl kəndi istiqamətində, smayıllı rayonunun Bəhliyan kəndi yaxınlığında baş vermiş yanğınların genişlənməsinin qarşısının alınması və söndürülməsi ilə bağlı da işlər həyata keçirilir.

Yanğınlarla mübarizə əməliyyatında Fövqəladə Hallar Nazirliyinin Dövlət Yanğından Mühafizə Xidməti, Mülki müdafiə qoşunları, Şimal-qərb Regional Mərkəzi və Aviasiya dəstəsinin ümumilikdə 430 nəfərə yaxın şəxsi heyəti və 21 ədəd texnikası, o cümlədən 3 ədəd helikopteri, Ekologiya və Təbii Sərvətlər Nazirliyinin əməkdaşları və yerli kənd sakinləri iştirak edir.