İndoneziya rəsmisi Ermənistanı kəskin tənqid edib

Zulkifli Həsən: “İndoneziya hər zaman Azərbaycanın yanında olacağını ən açıq formada bəyan edəcək”

Azərbaycanın İndoneziyadakı səfiri Tamerlan Qarayev bu ölkə parlamentinin Xalq Məşvərət Palatasının sədri Zulkifli Həsənlə görüşüb. Xocalı soyqırımının 24-cü ildönümü ilə əlaqədar təşkil olunan görüşdə İndoneziyanın Azərbaycana göndəriləcək yeni səfiri Hüsnan Bəy Fənani, Azərbaycan–İndoneziya parlamentlərarası dostluq qrupunun üzvü Linda Meqavatı və yerli KİV nümayəndələri iştirak ediblər.

Səfir T.Qarayev iki ölkə arasında ikitərəfli əlaqələrin inkişafından bəhs edib. Toplantının əsas məqsədinin Xocalı soyqırımının 24-cü ildönümü ilə əlaqədar olduğunu vurğulayan diplomat Ermənistanın Azərbaycana qarşı təcavüzünün hələ də davam etdiyini diqqətə çatdırıb. Bildirib ki, terrorizmi dövlət siyasəti səviyyəsinə qaldıran Ermənistan BMT Təhlükəsizlik Şurasının məlum qətnamələrinə məhəl qoymadan Azərbaycanın beynəlxalq səviyyədə tanınmış ərazilərini işğal altında saxlamaqda davam edir. İşğal altında olan ərazilərdə azərbaycanlılara aid bütün mədəni irs – məscidlər, tarixi abidələr, məzarlıqlar dağıdılır ki, bu da beynəlxalq təşkilatların və müşahidəçilərin hesabatlarında öz əksini tapıb. Səfir Ermənistan silahlı qüvvələrinin dinc əhaliyə, xüsusən qadın və uşaqlara qarşı törətdikləri vəhşiliklər barədə də ətraflı məlumat verib.

Xalq Məşvərət Palatasının sədri Zulkifli Həsən ermənilərin dinc əhaliyə, xüsusən uşaqlara qarşı törətdikləri vəhşilikləri ifadə etmək üçün söz tapa bilmədiyini qeyd edib və bu siyasətinə görə Ermənistanı kəskin tənqid edib.

Azərbaycana göndəriləcək yeni səfir Hüsnan Bəy Fənani Qarabağın işğalı haqqında əlavə məlumatlarla çıxış edib.

Zulkifli Həsən cari ildə Azərbaycana səfər etmək istədiyini, həm Milli Məclisdə, həm də mətbuat konfransında Ermənistanın Azərbaycana qarşı təcavüzünü pisləyəcəyini bildirib. O, İndoneziyanın hər zaman Azərbaycanın yanında olacağını ən açıq formada bəyan edəcəyini vurğulayıb.

Səfir T.Qarayev qarşı tərəfə Ermənistanın Azərbaycana qarşı təcavüzünə dair video və kitablardan ibarət müxtəlif materiallar təqdim edib.

Görüş haqqında məlumat və azərbaycanlı diplomatın müsahibəsi yerli mətbuatda geniş işıqlandırılıb.

Səxavət