"Real" rekorda doğru

İspaniya La Liqasının 14-cü turunda evdə "Selta Viqo"nu qəbul edəcək "Real" (Madrid) klubu rekordunu yeniləyə bilər.

Qol.Az-ın məlumatına görə, Madrid təmsilçisi bu görüşdə qalib gələcəyi təqdirdə ardıcıl qələbə seriyasını 18-yə yüksəldəcək.

Keçirdiyi son 17 oyunda qalib gələn Karlo Ançelottinin komandası bugünkü matçı da qələbə ilə başa vurmaq arzusundadır.

Bu barədə klubun rəsmi saytına danışan Ançelotti meydana rekord üçün deyil, 3 xal üçün çıxacaqlarını bildirib: "Selta Viqo" ilə önəmli oyuna çıxacağıq. Liderliyimizi əldən vermək istəmirik. Əsas hədəfimiz rekord deyil, 3 xal qazanmaqdır. Qələbə seriyamızı davam etdirdiyimiz üçün şadam. Bunun üçün əlimizdən gələni edəcəyik".

Qeyd edək ki, "Real" - "Selta Viqo" oyunu bu gün, Bakı vaxtı ilə saat 23:00-da başlayacaq.