Moskva meri Bakıda memorandum imzaladı

Sobyanin: “Azərbaycandan Moskvaya kənd təsərrüfatı məhsullarının çatdırılması sürətlənəcək”

Baş nazirin birinci müavini Yaqub Eyyubov bu gün Moskva meri Sergey Sobyaninin başçılıq etdiyi nümayəndə heyəti ilə görüşüb.

Teleqraf.com-un xəbərinə görə, Y.Eyyubov Rusiya nümayəndə heyətinin Azərbaycana bu səfərinin iki ölkə arasında əməkdaşlığın daha da genişləndirilməsi, dostluq əlaqələrinin möhkəmləndirilməsinə böyük töhfə olacağını bildirib. O qeyd edib ki, Azərbaycan Prezidenti bununla bağlı konkret tapşırıqlar verib və danışıqlarda bu məsələlər də önə çəkiləcək. Rusiyanın Azərbaycanın əsas tərəfdaşlarından biri olduğunu deyən Y.Eyyubov iki ölkə arasında əmtəə dövriyyəsinin yüksək olduğunu söyləyib. Baş nazirin birinci müavini Azərbaycanın Rusiyanın bir çox subyektləri ilə də sıx əlaqələr qurduğunu, bu sırada Moskvanın birinci yerdə durduğunu vurğulayıb.

Azərbaycanla Rusiya arasında çoxəsrlik əlaqələr olduğunu bildirən Sergey Sobyanin iki ölkə arasında ticarət dövriyyəsinin bu il 30 faiz artdığını bildirib. S.Sobyanin deyib ki, imzalanacaq sənədlər Azərbaycandan Moskvaya kənd təsərrüfatı məhsullarının çatdırılmasını sürətləndirəcək. Bu istiqamətdə əməkdaşlıq üçün geniş imkanlar mövcuddur. Mer, eyni zamanda, Moskvanın Azərbaycanla turizm, mədəniyyət, şəhər abadlığı sahələrində də əməkdaşlığı genişləndirə biləcəyini söyləyib. O, imzalanacaq sazişlərin ikitərəfli əlaqələrin inkişafına təkan verəcəyinə əminliyini vurğulayıb.

Görüşdə Azərbaycan və Moskva hökumətləri arasında anlaşma və əməkdaşlıq haqqında memorandum, Azərbaycandan Moskvaya kənd təsərrüfatı məhsullarımın çatdırılması ilə bağlı iş adamları arasında ikitərəfli sazişlər imzalanıb.

Səxavət