ABŞ Azərbaycanda aparılan islahatları dəstəkləyir - Səfir

Mən Azərbaycan və Ermənistan xarici işlər nazirlərinin Vaşinqtonda keçiriləcək növbəti mümkün görüşünü səbrsizliklə gözləyirəm.

Bunu ABŞ-ın Azərbaycandakı səfiri Örl Litzenberger Bakıda "Alumni Fair" təhsil sərgisi zamanı deyib.

Səfir qeyd edib ki, ABŞ ATƏT-in Minsk qrupunun üç həmsədrindən biridir və qrupun məqsədi tərəfləri münaqişənin sülh yolu ilə həllinə doğru gətirməkdir:

“Biz XİN rəhbərlərinin Moskvada keçirilmiş görüşünü, eləcə də görüşdən sonrakı bəyanatı alqışlayırıq. Hamımız tərəflərin dialoqunun davam etdirilməsini səbrsizliklə gözləyirik. Biz şadıq ki, XİN rəhbərləri növbəti görüşünü keçirəcək”.

Qeyd edək ki, ABŞ Azərbaycan və Ermənistan Xarici İşlər Nazirliyi (XİN) rəhbərlərinin Dağlıq Qarabağ münaqişəsinin nizamlanması üzrə növbəti görüşünü Vaşinqtonda keçirməyi təklif edib.

Görüş təklifi barədə Azərbaycanın XİN rəhbəri Elmar Məmmədyarov bildirib:

"Dünən ABŞ tərəfindən Vaşinqtona səfər etmək təklifi aldıq, burada da Dövlət katibi bu münaqişənin nizamlanmasına nail olmaq yolunda öz təkliflərini səsləndirəcək".

Örl Litzenberger deyib ki, Azərbaycan islahatların keçirilməsində böyük irəliləyişə nail olub.

O deyib: "Biz Azərbaycanın islahatların keçirilməsində səylərini dəstəkləyirik. Azərbaycan bu sahədə böyük irəliləyişə nail olub".

Diplomat qeyd edib ki, Azərbaycan hələ gənc ölkədir, hələ bir çox işlər görülməlidir:

"Biz hökumətin iqtisadi, sosial sektorlarda və vətəndaş cəmiyyəti sahəsində islahatlarını dəstəkləyirik"./Trend/