Tələbə imtahan formasını özü seçəcək - Yenilik

Qərb Universiteti daha bir yeniliyin tətbiqinə başlayıb.

Universitetdən Teleqraf.com-a verilən məlumata görə, burada təhsil alan tələbələr bundan sonra imtahan modelini özləri müəyyən edə biləcəklər.

Dəyişikliyə əsasən, tələbələr semester boyu keçdikləri fənlər üzrə müvafiq kursun formatına uyğun olaraq təklif olunan imtahan modellərindən birini seçərək imtahan vermək şansı qazanacaqlar.

Mövcud imtahan formaları ilə yanaşı (Test üsulu, Şifahi imtahan, Baxış imtahanı, Açıq suallar), yeni imtahan modellərinə “Açıq kitab”, “Təqdimat”, “Keys həlli” kimi beynəlxalq akademik səviyyədə tətbiq olunan üsullar daxildir.

Bu üsullar tələbələrə yalnız nəzəri deyil, praktik biliklərin də mənimsədilməsinə imkan verir.

Qeyd edək ki, bir müddət öncə edilmiş dəyişikliyə əsasən tələbələrin biliklərinin qiymətləndirilməsində Qərb Universiteti başqa bir yeniliyə imza atıb. Hər hansı bir fənn üzrə imtahandan müvəffəq nəticə göstərməmiş tələbələr üçün tamamilə ödənişsiz əsaslarla intensiv kurslar və konsultasiya saatları təşkil olunur.

İlhamə