7 İyul 2017 18:32
2 133

Avtomobilin alqı-satqı və ya dövlət qeydiyyat nişanının dəyişdirilməsi zamanı icbari sığortası varsa, o, sığortalanmış sayılır. Avtomobilin icbari sığortası ola-ola, dövlət qeydiyyat nişanının dəyişdirilməsi onun icbari sığortasının etibardan düşməsi anlamına gəlmir”.

Bu sözləri sığorta mütəxəssisi Nicat Əlibəyli Teleqraf.com-a açıqlamasında bildirib.

Nicat Əlibəyli qeyd edib ki, avtomobillərin alqı-satqısı və ya dövlət qeydiyyat nişanının dəyişdirilməsi zamanı onun icbari sığortası olduğu halda, DYP tərəfindən cərimələnən sürücülərin sığorta şirkətlərinə şikayət etməsi bu məsələni yenidən aktuallaşdırıb.

Sığorta mütəxəssisi hesab edir ki, belə halda vətəndaş sadəcə sığorta şirkətinə müraciət etməli, sistemdən avtomobilin köhnə nömrəsini sildirib yenisini əlavə etdirməlidir: “Bu müddət ərzində sürücülər DYP əməkdaşlarının quraşdırdığı xüsusi cihaz vasitəsi ilə elektron qaydada cərimələnə bilərlər. Lakin hesab edirəm ki, belə hal ədalətli sayılmaz. Alqı-satqı və ya dövlət qeydiyyat nişanının dəyişdirilməsinə qədər avtomobilin icbari sığortası olubsa, deməli, onun sığortası var.

Hesab edirəm ki, vətəndaş DYP-ə müraciət edərək, avtomobilinin sığortalı olduğunu bildirməklə, sadəcə dövlət qeydiyyat nişanının dəyişdirilməsini səbəb kimi göstərə, cərimənin silinməsinə nail ola bilər. Böyük ehtimalla, belə halda sığorta şirkətindən rəsmi məktub tələb olunacaq.”

Məsələ ilə bağlı Bakı Şəhər Dövlət Yol Polisi İdarəsi İctimaiyyətlə əlaqələr şöbəsinin rəisi Vaqif Əsədov da açıqlama verib:

“Bu suala belə aydınlıq gətirərdim. Məsələn, siz şəxsiyyət vəsiqənizi alarkən, adınız Şərqiyyə olub, daha sonra adınızı dəyişib Mahirə qoyursunuz. Axı, pasportdan sizi Mahirə kimi tanıyırlar. Bu, bir texniki problem kimi qarşıya çıxır.

Yol nəqliyyat vasitələri qanunvericilikdə tələb edildiyi kimi mütləq sığortalanmalıdır. Bu, çox vacibdir. Təbii ki, sığorta yol nəqliyyat hadisəsi zamanı bir çox problemləri aradan qaldırır. Sürücülər arasında narazıçılığa son qoyur, sürücü-polis münasibətini tənzimləyir, dəymiş maddi zərərin avtomatik ödənilməsini təmin edir.

Lakin nəqliyyat vasitəsi üzərində hər hansı əməliyyat aparılarkən, məsələn, elə nəqliyyat vasitəsinin dövlət nömrə nişanları dəyişilərkən, mütləq sığorta idarəsinə və Dövlət Yol Polisinə məlumat verilməlidir ki, sistemdə də bu dəyişiklik yerinə yetirilsin.

Məsələn, mən avtomobilimi sığortalayanda onun nömrəsi 10 BB 661 idi. Sığortaladıqdan sonra nömrəsini dəyişib 99 AB 604 elədim. Təbii ki, bu zaman sistemdə dəyişikliklə bağlı informasiya olmayacaq. Sadəcə, sürücülər sığorta şirkətlərinə şikayət etmədən öncə sığortalarının olması barədə məlumat versələr, yetərlidir.”

Vaqif Əsədov məsələnin həlli üçün tədbirlər görüldüyünü bildirib: “Bu məsələnin avtomatik həll edilməsi üçün tədbirlər görülür. Narahatçılığa əsas yoxdur”.


Müəllif: Könül Əlibəyli