Onlayn tərcümə saytı fəaliyyətə başladı - ASAN

İstifadəyə verilmiş www.tercume.asan.az onlayn tərcümə saytı vasitəsi ilə sənəd və ya mətnlərin tərcüməsini elektron qaydada həyata keçirmək mümkündür. Hər hansı vətəndaş və ya ölkəmizdə olan əcnəbi şəxs sayt vasitəsilə tərcümə olunacaq məlumatı yükləyib tərcümə dilini seçə bilər.

ASAN Xudmət Mərkəzindən Teleqraf.com-a verilən məlumata görə, əlaqə vasitəsi olaraq istifadəçinin emaili əsas götürülür. O cümlədən telefon nömrəsini də qeyd etmək mümkündür. Həmçinin tərcümənin natorial təsdiqinin lazım olub-olmaması və kuryer vasitəsilə çatdırılması üçün seçim imkanları var.

Məlumat tərcümə mərkəzinə daxil olduqda istifadəçiyə bu barədə bildiriş emaili gəlir. Sonra tərcümə mərkəzinin əməkdaşı tərcümənin qiymətini təyin edir. Seçimə uyğun olaraq notarius və kuryer qiymətləri də əlavə olunur. Bütün qiymətlər saytın “Qiymət cədvəli” menyusunda (http://tercume.asan.az/qiymet-cedveli) göstərilib.

Tərcümənin yekun qiyməti istifadəçinin emailinə daxil olduqdan sonra o "ASAN ödəniş" sistemi vasitəsilə ödəməni həyata keçirir. Ödənişdən sonra tərcümə həyata keçirilir.

Hazır sənədlər isə müvafiq olaraq email vasitəsi ilə göndərilə və kuryer vasitəsilə çatdırıla bilər.

"ASAN xidmət" mərkəzlərinin xüsusi iş rejimindəki fəaliyyəti başa çatdıqdan sonra hazır sənədlərin müvafiq mərkəzlərdən götürülməsi imkanı da təmin ediləcək.