6 çimərlik istifadəyə hazır vəziyyətə gətirilib - Aparat rəhbəri

Çimərliklərdə bütün görülən işlərin əsas məqsədi COVID-19 infeksiyasının yayılmasının qarşısını almaqdır.

Teleqraf.com xəbər verir ki, bunu Bakı şəhər İcra Hakimiyyəti başçısı Aparatının rəhbəri Elgin Həbibullayev Nazirlər Kabineti yanında Operativ Qərargahın bugünkü brifinqində deyib:

"Çimərliklərdə işləyən qruplarla maarifləndirmə işləri aparılıb, müvafiq təlimatlar verilib. Eyni zamanda bütün çimərliklərdə məlumatlandırıcı lövhələr yerləşdirilib. Bu informasiya sosial məsafənin qorunması, gigiyena qaydalarına riayət olunması ilə bağlıdır. Heydər Əliyev Fondunun vitse-prezidenti Leyla Əliyevanın rəhbəri və təsisçisi olduğu İDEA İctimai Birliyi tərəfindən 6 çimərlik istifadəyə hazır vəziyyətə gətirilib. Eyni zamanda hər bir saatdan bir səsli məlumatlandırma mövcud olacaqdır. Həmçinin çimərlikdə işarələnmələr aparılıb ki, insanlara sosial məsafənin saxlanılması üçün köməkçi vasitə olacaq".

O qeyd edib ki, çimərliklərdə dezinfeksiya işləri və tullantıların daşınması üçün Bakı Şəhər Mənzil-Kommunal Təsərrüfatı Departamenti tərəfindən nəzarət olunacaq:

"Müvafiq strukturlar tərəfindən bütün lazım olan tədbirlər görülür. Lakin ən əsas vəzifə vətəndaşlarımızın öhdəsinə düşür. Çimərliklərin açılması bəzi insanlarda rahatlığa səbəb ola bilər. Burada çox diqqətli olmalıyıq, qaydalara ciddi şəkildə riayət etməliyik".