1 Dekabr 2022 13:25
200
12 Punto 14 Punto 16 Punto 18 Punto

FAO və Aqrarco MMC arasında imzalanmış, fermerlərin bilik və bacarıqlarının artırılması və fındıq dəyər zəncirində davamlı bioenerji variantlarının tədqiqi ilə bağlı fəaliyyətlərin icrasını əhatə edən tərəfdaşlıq sazişinin bir hissəsi kimi, Zaqatala, Balakən, Qax, Oğuz, Qəbələ və Xaçmaz rayonlarında fındıqçı fermerlərə dəstək üçün yeni təşəbbüslər baş tutub.

Teleqraf.com xəbər verir ki, BMT-nin Ərzaq və Kənd Təsərrüfatı Təşkilatı (FAO) Aqrarco MMC ilə birgə fındıqçı fermerlərə dəstək tədbirləri həyata keçirir.

Fəaliyyətlər “Azərbaycanda fındıqçılıq sahəsində səmərəliliyin və dayanıqlılığın sürətləndirilməsi – UTF/AZE/016/AZE” layihəsi çərçivəsində həyata keçirilir.

Qeyd olunan əməkdaşlıq özəl sektor ilə tərəfdaşlığı genişləndirməyi təmin etməklə Dayanıqlı İnkişaf Məqsədlərinə (DİM) nail olmaq üçün bir sıra istiqamətlər üzrə səyləri birləşdirməyə yönəlib:

daha çox sayda fermerin (xüsusilə kiçik təsərrüfat sahibləri) bilik və bacarıqlarının artırılmasına dəstək və ölkədə kənd təsərrüfatı və ərzaq istehsalı sistemlərinin daha da inkişaf etməsinə töhfə vermək;

genişmiqyaslı inkişaf fondlarından, xüsusən də Yaşıl İqlim Fondundan (YİF) birgə maliyyələşdirmə imkanlarının artırılması əsas fəaliyyət istiqamətlərindən biridir.

Fəaliyyətlər çərçivəsində bir çox xidmətlərə məhdud çıxışı olan kiçik təsərrüfat sahibləri kənd təsərrüfatı istehsalında aparıcı aqrobiznes şirkətlərindən birinin tətbiq etdiyi texnoloji yeniliklər və proseslərin mümayişində iştirak ediblər. Qarşılıqlı təcrübə mübadiləsi iştirakçıların bacarıqlarının və bu sahədə məlumatlılığının artırılmasına dəstək olmuşdur.

3 günlük praktiki təlimlərdə iştirakçılara Aqrarco MMC-nin fəaliyyəti haqqında ətraflı məlumat verilib. Şirkət öz bağlarında qış budamalarını nümayiş etdirərək və yuxarıda qeyd olunan hədəf rayonlarda fəaliyyət göstərən 60 nümayiş sahəsindən olan fermerlər üçün qış tədbirlərinin keçirilməsinin və funqisidlərlə çiləmənin vacibliyini əyani olaraq nümayiş etdirərək fermerlərin diqqətinə çatdırıb. Təlimlər zamanı, FAO-nun beynəlxalq ekspertinin iştirakı ilə fındıq qərzəyindən kompostun hazırlanması prosesi də nümayiş etdirilərək Qabaqcıl Kənd Təsərrüfatı Təcrübələrinin tətbiqinin vacibliyi bir daha vurğulanıb.

Sahə səfərlərində iştirakçılar, həmçinin fındığın yığılması, yığımdan sonra qurudulması və saxlanması proseslərinin düzgün təşkilinin vacibliyi barədə də məlumatlandırılıb.


Müəllif: Nemət