Bakının 4 rayonunda əməliyyat: Həbs olunanlar var

Bakıda bir neçə cinayətin üstünün açılması barədə ayrı-ayrılıqda əməliyyat keçirilib.

Teleqraf.com xəbər verir ki, Xəzər rayon Polis İdarəsinin 1-ci polis bölməsi əməkdaşlarının keçirdikləri əməliyyat-axtarış tədbirləri nəticəsində yanvarın 25-də rayon ərazisindəki evlərin birindən 800 manat pul və 600 manat dəyərində qızıl-zinət əşyaları oğurlamaqda şübhəli bilinən Bakı şəhər sakini, əvvəllər məhkum olunmuş M.Yusibov saxlanılıb.

Bundan başqa, Səbail rayon Polis İdarəsinin 8-ci polis bölməsinə müraciət edən Bakı şəhər sakini İ.Şahbəndiyeva yanvarın 27-də Salyan yolu küçəsində bir nəfərin ona zor tətbiq edərək içərisində 90 manat, sənəd və bank kartı olan çantasını aldığını bildirib.

Polis əməkdaşlarının keçirdikləri əməliyyat-axtarış tədbirləri nəticəsində soyğunçuluğu törətməkdə şübhəli bilinən Bakı şəhər sakini Ə.Rəcəbov müəyyən edilib.

Daha bir əməliyyat Qaradağ rayonunda keçirilib.

10-cu polis bölməsi əməkdaşlarının əldə edilmiş məlumat əsasında keçirdikləri əməliyyat tədbiri nəticəsində narkotiklərin qanunsuz dövriyyəsində şübhəli bilinən Lökbatan qəsəbə sakini R.Məlikov saxlanılmışdır. Şəxsi axtarış zamanı ondan 10 qrama yaxın marixuana aşkar edilərək götürülüb.

Davam etdirilən tədbirlərlə onun evindən əlavə olaraq 460 qrama yaxın marixuana aşkar edilib.

Nəsimi rayon Polis İdarəsinin 19-cu polis şöbəsi əməkdaşlarının keçirdikləri əməliyyat-axtarış tədbirləri nəticəsində yanvarın 17-dən 24-dək olan müddətdə rayon ərazisində 5 avtomobildən 300 manat, maqnitofon, 3 ədəd səsgücləndirici, ərzaq məhsulu oğurlamaqda şübhəli bilinən Bakı şəhər sakini T.Novruzov saxlanılıb.

19-cu polis şöbəsi əməkdaşlarının keçirdikləri daha bir əməliyyat-axtarış tədbirləri nəticəsində yanvarın 2-dən 27-dək olan müddətdə Nəsimi rayon ərazisində 8 avtomobildən ümumilikdə 870 manat, 2500 manat dəyərində qızıl-zinət əşyası, mobil telefon, sənəd, videoqeydiyyat və naviqator qurğusu oğurlamaqda şübhəli bilinən Bakı şəhər sakini, əvvəllər məhkum olunmuş K.Nəcəfov saxlanılıb.