Bakının üç rayonunda əməliyyat: 6 nəfər həbs edildi

Bakının Nərimanov rayonunda oğurluq hadisəsi baş verib.

Teleqraf.com xəbər verir ki, iyunun 15-də Bakı şəhər sakini E.Təhməzovun “VAZ-2106” markalı avtomobilinin qaçırılması barədə Nərimanov RPİ-nin 17-ci Polis Şöbəsinə müraciət daxil olub.

Polis əməkdaşlarının keçirdikləri əməliyyat-axtarış tədbirləri nəticəsində nəqliyyat vasitəsini qaçırmaqda şübhəli bilinənlər - Balaxanı qəsəbə sakinləri M.Qasımov və əvvəllər məhkum olunmuş E.Heydərov müəyyən edilərək saxlanılıblar.

Bundan başqa, Binəqədi rayon Polis İdarəsinin 40-cı polis bölməsi əməkdaşlarının keçirdikləri əməliyyat-axtarış tədbirləri nəticəsində iyunun 16-na keçən gecə Xocəsən qəsəbəsindəki mağazaların birindən 504 manat dəyərində mobil telefon və 285 manat pul oğurlamaqda şübhəli bilinən Bakı şəhər sakini, əvvəllər məhkum olunmuş Ə.Babayev tutulub.

Oğurluq etdiyinə görə tutulmuş S.Pənahovun ətrafında Nərimanov rayon Polis İdarəsinin 18-ci polis şöbəsində araşdırma aparılıb.

Onun rayon ərazisindəki 1 gözəllik salonundan 1700 manat pul və 1 ofisdən 170 manat pul, 250 manat dəyərində mobil telefon və qol saatı oğurlaması müəyyən edilib.

Xətai rayon Polis İdarəsinin 34-cü polis şöbəsi əməkdaşlarının keçirdikləri əməliyyat-axtarış tədbirləri nəticəsində rayon ərazisindəki 3 mənzildən qızıl-zinət əşyaları oğurlamaqda şübhəli bilinən Bakı şəhər sakinləri C.Həsənov və əvvəllər məhkum olunmuş P.Mustafayev saxlanılıblar.