Cəzaçəkmə müəssisəsində şok olay

Qadın alt paltarında tanışına narkotik gətirdi

Ədliyyə Nazirliyinin Penitensiar xidmətinin 2 saylı cəzaçəkmə müəssisəsinə narkotik vasitə keçirilməsinin qarşısı alınıb. Bu barədə Teleqraf.com-a Penitensiar xidmətin ictimaiyyətlə əlaqələr şöbəsindən məlumat verilib.

Məlumata görə, xidmət əməkdaşları tərəfindən həyata keçirilmiş axtarış-baxış tədbirləri nəticəsində 2 saylı cəzaçəkmə müəssisəsində cəza çəkən məhkum Orxan Ağasəf oğlu Səfərəliyevin yanına qısamüddətli görüşə gəlmiş qohumu Tamara Kamil qızı Əzizovanın görüş otağında üzərinə və əşyalarına baxış keçirilib.

Baxış zamanı Tamara Əzizovanın alt paltarında xüsusi üsulla gizlədilmiş sellofan paketlərdə 100 ədəd dərman həbi – metodon, 3,882 qram narkotik maddə - heroin və 4,480 qram narkotik maddə - həşiş qətranı aşkar edilərək götürülüb.

Orxan Səfərəliyev Cinayət Məcəlləsinin 181.1.2-ci (quldurluq) maddəsi ilə məhkum edilib. İttihama görə, 2010-cu ilin dekabrın 18-də Mingəçevir şəhəri ərazisində Orxan Səfərəliyev M.Maqomayev küçəsi 14-də yerləşən aptekdə oranın satıcısı, həmyerlisi Rəfael Mustafayevi bıçaqla hədələyərək 60 manat pulunu ondan alıb. Mingəçevir Şəhər Polis Şöbəsi əməkdaşlarının həyata keçirdikləri əməliyyat-axtarış tədbirləri nəticəsində Orxan Səfərəliyev tutulub. O, Şəki Ağır Cinayətlər Məhkəməsində mühakimə edilib və 8 il müddətinə azadlıqdan məhrum edilib.

Fakt üzrə araşdırma aparılır.

Hacı Zeynalov