Polis rəisini güllələyən məhkəmə qərarından şikayət verdi

Bakı Apelyasiya Məhkəməsində odlu silahla cinayət törətməkdə təqsirli bilinən Gülağa Lətifovun məhkəməsi keçirilib.

Teleqraf.com xəbər verir ki, əvvəllər məhkumluq həyatı yaşamış Gülağa Lətifov bu ilin fevralın 23-də saat 20.00-da Sabunçu qəsəbəsindəki 68 saylı orta məktəbin yaxınlığında ağır cinayət törədib.

Gülağa Lətifov münaqişə zəminində qonşuluqda yaşayan Fərid Qədirova, Akif Nəzərova, Yusif Paşayevə və Asif Nəzərova odlu silahdan atəş açaraq hadisə yerindən qaçıb. Fərid Qədirov aldığı xəsarətdən ölüb, digərləri xəstəxanaya yerləşdiriliblər.

Istintaq araşdırması zamanı Gülağa Lətifov müvafiq dövlət orqanlarının icazəsi olmadan və yerli icra nümayəndəliyi tərəfindən edilmiş xəbərdarlıqlara məhəl qoymayaraq həmin məktəblə üzbəüz yerləşən açıq idman meydançasında tikinti işləri aparmağa başlayıb. Onun bu hərəkətləri növbəti dəfə ərazidə yaşayan sakinlərin narazılığına səbəb olub. Yaranmış münaqişədə Gülağa Lətifov şəxsi avtomobilində gəzdirdiyi odlu silahdan qəsəbə sakinlərinə bir neçə dəfə atəş açıb. Hadisə yerinə gələn polis və prokurorluq orqanlarının əməkdaşları tərəfindən oradan 1 ədəd qoşalülə ov tüfəngi və 4 ədəd giliz, habelə Gülağa Lətifovun evinə baxış zamanı 19 ədəd patron aşkar edilib.

Hadisə zamanı güllə yarası alan Akif Nəzirov Suraxanı rayon Polis İdarəsinin rəis müavinidir. Digər yaralı Akif Nəzərovun oğlu Asif Nəzərov isə Sabunçu rayon Polis İdarəsinin 12-ci Polis Bölməsinin əməkdaşıdır.

Bakı Ağır Cinayətlər Məhkəməsinin hökmü ilə Gülağa Lətifov ömürlük azadlıqdan məhrum edilib. Hökmdən narazı qalan Gülağa Lətifov apelyasiya şikayəti verərək barəsində təyin olunmuş ömürlük azadlıqdan məhrum etmə cəzasının ləğv edilməsini və cəzasının müddətli cəza ilə əvəz edilməsini xahiş edib.

Hakim Mirzəli Abbasovun sədrliyi ilə keçirilən prosesdə Gülağa Lətifovun apelyasiya şikayətinə məhkəmə istintaqı ilə baxılmasını istəyib. Müdafiə tərəfi bildirib ki, birinci məhkəmə isntansiyasında işə ədalətli baxılmayıb. Bu səbəbdən də əlavə şahidlərin dindirilməsi, sübutların araşıdılması istənilib.

Amma hakimlər vəsatəti təmin etməyiblər və işə məhkəmə istintaqı aparılmadan baxılması barədə qərar qəbul ediblər. Qərardan narazı qalan Gülağa Lətifov kasasiya şikayəti verib. O, şikayətində Bakı Apelyasiya Məhkəməsinin ilkin baxış iclasının qərarının ləğv edilməsini, apelyasiya şikayətinə məhkəmə istintaqı aparılmaqla baxılmasını istəyib. Onun kasasiya şikayəti baxılması üçün Ali Məhkəməyə göndərilib. Bu səbəbdən də apelyasiya instansiyasında işin baxılması qeyri müəyyən vaxtadək təxirə salınıb.

Hacı Zeynalov