Oğurluq edən gürcüstanlıya hökm oxundu

Oğurluq etməkdə təqsirli bilinən Gürcüstan Respublikasının Loqadex rayonunda anadan olan 1984-cü il təvəllüdlü Elçin Rüstəmovun cinayət işi üzrə məhkəmə prosesi başa çatıb.

Teleqraf.com xəbər verir ki, Elçin Rüstəmov 5 aprel 2015-ci il tarixdə, saat 22 radələrində Gəncə şəhəri, Cavadxan qəsəbəsində Niyaməddin Səbzəliyevə məxsus evin qapısını təpiklə vuraraq sındırıb. O, evdən 700 manat dəyərində bir ədəd “LG” markalı televizoru oğurlayıb.

Bundan əlavə, Elçin Rüstəmov istintaqa məlum olmayan vaxt və mənbədən satış məqsədi olmadan 17,10 qram çəkidə narkotik vasitə olan qurudulmuş marixuananı əldə edib. O, aprelin 6-da, saat 23 radələrində Gəncə şəhəri, Cavadxan qəsəbəsində Kəpəz rayon polis idarəsinin əməkdaşları tərəfindən saxlanılıb. Narkotik vasitə onun üzərində aşkarlanıb.

Elçin Rüstəmov Cinayət Məcəlləsinin 177.2.3-cü (yaşayış sahəsinə, habelə binaya, anbara və ya başqa saxlanc yerlərinə qanunsuz daxil olmaqla oğurluq törətmək) və 234.1-ci (satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama) maddələri ilə ittiham edilib.

Kəpəz rayon Məhkəməsinin hökmü ilə Elçin Rüstəmov 4 il müddətinə azadlıqdan məhrum edilib. Hökmdən narazı qalan Elçin Rüstəmov apelyasiya şikayəti verib. O, şikayətində cəzasının daha yüngül cəza ilə əvəz edilməsini istəyib.

Onun şikayəti araşdırılması üçün Gəncə Apelyasiya Məhkəməsinə göndərilib. Apelyasiya şikayəti hakim Fikrət Əliyevin sədrliyi ilə keçirilən prosesdə araşdırılıb.

Elçin Rüstəmov bildirib ki, birinci instansiya məhkəməsi tərəfindən Azərbaycan Respublikasının qanunvericiliyinin maddə və müddəaları düzgün tətbiq edilməyib: “İbtidai və məhkəmə istintaqı zamanı çoxlu sayda qanun pozuntularına yol verilib. Mənim məhkəməyə şifahi olaraq ünvanladığım hal və xüsusatlar nəzərə alınmayıb. Xarici vətəndaş olduğumu, qərib vətəndaş olduğumu, anamın xəstə olduğunu, ailəmin, övladımın köməksiz vəziyyətdə olmasını, maddi cəhətdən imkansız olmağımı, ailəmə baxan yeganə insan olmağımı, səhhətimdə problemlər olmasını məhkəməyə bildirsəm də, məhkəmə nəzərə almayıb”.

Dövlət ittihamçısı isə apelyasiya şikayətinə etiraz edib. O, bildirib ki, təqsirləndirilən şəxs ictima xarakterli ağır cinayət törədib. Daha sonra hakim heyəti qərar elan edib. Qərara görə, Elçin Rüstəmovun apelyasiya şikayəti təmin edilməyib.

Hacı Zeynalov