131 və 172 saylı avtobus sürücüləri yolda qaydaları kobud şəkildə pozduqları üçün həmin marşrut xəttləri üzrə daşıyıcı şirkət rəhbərləri təcili Bakı Nəqliyyat Agentliyinə (BNA) çağırıldı.
Bunu Teleqraf.com-a açıqlamasında BNA-nın İctimaiyyətlə əlaqələr şöbəsinin müdiri Mais Ağayev deyib.
Onun sözlərinə görə, yol hərəkəti qaydalarını kobud şəkildə pozan sürücüləri müəyyənləşdirib, lazımı tədbirlərin görülməsi ilə bağlı daşıyıcı şirkət rəhbərlərinə tapşırıq verilib: “Diqqətə çatdırılıb ki, bu cür halların təkrarlanmaması üçün sürücülərin təlimatlandırılması işinə nəzarət gücləndirilsin. Bir daha bildiririk ki, sərnişinlərin həyatını birbaşa təhlükəyə atan, qoyulan tələblərə və qaydalara əməl etməyənlərə qarşı BNA-i hər zaman sərt mövqeydə olub”.
Mais Ağayev qeyd edib ki, BNA-i tərəfindən Bakıətrafı kənd və qəsəbələrdə sərnişindaşıma xidmətinin keyfiyyətinin artırılması ilə bağlı kompleks təbirlərin görülməsi nəzərdə tutulub: “Həmin tədbirlərin icrası nəticəsində bu cür xoşagəlməz halların qarşısı alınmış olacaq”.
Qeyd edək ki, sərnişinlər mediaya Zabrat-Koroğlu yolunda 131 və 172 saylı avtobuslar yolun əks istiqamətində yüksək sürətlə hərəkət etməsi, hər iki avtobus sərnişinlə dolu, qapıları açıq və qapılardan da sərnişinlər sallanması ilə bağlı video yollayıblar.