Vaqif Səmədoğludan yeni xəbər var

“Vaqif müəllimin vəziyyəti ortadır. Müalicəsi davam edir. Ancaq yay fəsli ilə əlaqədar iynələrin vurulması saxlanıb. İstilər qurtarsın, yenə davam edəcək. İndi bağdayıq, dincəlir”.

Teleqraf.com-un məlumatına görə, bu sözləri axar.az-a xalq şairi Vaqif Səmədoğlunun xanımı Nüşabə Vəkilova deyib.

Şairin həyat yoldaşının sözlərinə görə, V.Səmədoğlunun İsrailə yenidən müalicəyə aparılması planı yoxdur.

N.Vəkilova bildirib ki, V.Səmədoğlu arabir internetə daxil olur, şeirlərini paylaşır: “Bir-iki gün qabaq bir şeirini Facebook-da yaymışdı”.

Teleqraf.com sözügedən şeiri təqdim edir:

O gün

bir insan öldürmədi başqasını,

kəsildi müharibələrin səsi,

bir əclaf əli qalxmadı qadına.

Yaman sərxoş idim o gün...

O gün

yaşımı da, azarımı da unudub,

sarıldın 22 illik bədəninlə mənə,

gözlərini yumub, azacıq araladın dodaqlarını.

Yaman sərxoş idim o gün...