Musiqi Teatrda növbəti premyera - FOTOLAR

Dövlət Musiqili Teatrında mövsümün növbəti premyerası olacaq.

Teatrın mətbuat xidmətinin rəhbəri Samir Sədaqətoğlu Teleqraf.com-a açıqlamasında bildirib ki, may ayının 16-da balacalara yeni uşaq tamaşası - “Dəcəl çəpişlər” təqdim ediləcək.

Tamaşa Azərbaycan ədəbiyyatının böyük simalarından biri olan Mikayıl Müşfiqin məşhur “Şəngülüm, Şüngülüm, Məngülüm” əsərinin motivləri əsasında hazırlanıb. Yeni səhnə əsərinin musiqisi uşaqların sevimli bəstəkarı, xalq artisti Oktay Zülfüqarova, liberettosu Ramiz Heydərə məxsusdur. Tamaşanın quruluşçu-rejissoru Əhəd Hacıyevdir.

Rejissor tamaşaya bir sıra yeni obrazlar və yetərincə müasir elementlər əlavə edildiyini vurğulayıb: “Yaradıcı heyətimiz əsasən gənclərdən ibarətdir. Bizlərə göstərilən bu etimada görə teatrımızın direktoru Əliqismət Lalayevə təşəkkürümüzü bildiririk. Bu bir daha sübut edir ki, Musiqili Teatrda gənclər üçün kifayət qədər yüksək yaradıcı şərait yaradılıb”.

“Dəcəl çəpişlər” 1 İyun Uşaqların Beynəlxalq Müdafiəsi Gününə Musiqili Teatrın gözəl bir hədiyyəsi olacaq. Premyeraya uşaq evlərindən balaca tamaşaçılar, imkansız ailələrin övladları və fiziki qüsurlu uşaqlar da dəvət olunacaq.

Qeyd edək ki, tamaşanın rejissor-assisenti Elməddin Dadaşov, geyim üzrə rəssamı Yelena Almazova, quruluşçu-baletmeystləri Leyla və Zakir Ağayevlərdir. Tamaşada rolları aktyorlar Şaban Cəvərov, Güldanə Əzimova, Elçin İmanov, Gülçöhrə və Gülnarə Abdullayevalar, Ağaxan Şərifov, Mehriban Zalıyeva, Əlif Cahangirov, Gülnarə Əzizova, Nərmin Əliyeva , Fərid Rzayev, Rəsmiyyə Nurməmmədova, Ruslan Mürsəlov, Elxan İsmayılov ifa edirlər.

Nərmin