Xalq artistindən “Azdrama” rəhbərinə ağır ittiham

İlham Əsgərov: “Teatrın repertuarındakı tamaşaların çoxu səviyyəsizdir"

“Yeni sezonda Akademik Milli Dram Teatrında çox şeylərin dəyişməsini istərdim”.

Bu sözləri Teleqraf.com-a Akademik Milli Dram Teatrının xalq artisti İlham Əsgərov bildirdi. Aktyor qeyd etdi ki, teatrın əvvəlki simasını, nüfuzunu özünə qaytarmaq lazımdır: “Teatrda hər şey göz qabağındadır. Teatra dəvət edilən rejissorların işlərindən xəbərləri yoxdur. Heç adlarına rejissor da demək istəməzdim. Ümumiyyətlə, rejissorluqdan xəbərləri yoxdur. Yoldan keçənlərdir. Onlarla işləyə bilmirəm. Təhsilini soruşanda baxırsan ki, rejissor təhsili də almayıblar. Buna görə neçə-neçə aylarımı boş keçirirəm, köhnə tamaşaları oynayıram. Bəzi tamaşalar repertuardan çıxarılıb. Direktor teatra gələndə bəyənmədiyi tamaşaları repertuardan çıxardı. Biz əvvəl ay ərzində bir tamaşanı üç-dörd dəfə oynayırdıq, amma indi bir dəfə oynayaq, ya da oynamayaq. Amma özünün sevdiyi tamaşalar tez-tez nümayiş olunur və sevdiyi aktyorları tez-tez çıxış edirlər. Hansı ki, o aktyorları teatra direktorun özü gətirib. Teatrın repertuarında tamaşalar çoxdur, amma əksəriyyəti səviyyəsizdir. Bizim əsl peşəkar ressisorlarımız yoxdur və teatr başsız atlı kimidir”.

Xalq artisti onu da dedi ki, əvvəllər direktorun qəbuluna düşmək çox çətin idi: “İndi nə vaxt istəsək, gedə bilirik və direktora fikirmizii bildiririk. Axı direktorun da öz işləri var. Baş rejissorumuz olmalıdır ki, bütün dərdimizi ona bildirək. Düzdü, direktorun özünə görə səlahiyyətləri var. Lakin onun rejissorun işinə qarışmasını o qədər də düzgün hesab etmirəm. Rejissora sərbəstlik verilməldir. Aktyorun, rejissorun, bəstəkarın öz işi var”.

Rəqsanə Həsənova