Putin-Zelenski danışıqları bir şərtlə mümkündür - Kreml

Kreml Rusiya və Ukrayna prezidentləri Vladimir Putin və Vladimir Zelenski arasında danışıqların təşkili üçün heç bir maneə görmür.

Teleqraf.com xəbər verir ki, bunu Rusiya liderinin mətbuat katibi Dmitri Peskov bildirib.

O deyib ki, ancaq təmaslar Ukraynanın Moskvanın təhlükəsizlik problemləri barədə danışmağa hazır olduğu halda mümkündür.

“Əgər Ukrayna rəhbərliyi bu barədə danışmağa hazırdırsa”, - deyə Peskov jurnalistlərə Rusiyanın təmaslara hazır olub-olmaması sualına cavab olaraq deyib.

O xatırladıb ki, Putin artıq Rusiyanın Ukraynadan nə gözlədiyi ilə bağlı öz baxışını formalaşdırıb, beləliklə, konseptual qırmızı xətt problemləri həll edilib.

“Biz bunu kifayət qədər aydın şəkildə formalaşdırmışıq: bu, neytral statusdur, bu, silah sistemlərindən imtinadır... Burada sual Ukrayna rəhbərliyinin buna hazır olub-olmamasıdır”, - Peskov əlavə edib.