Rusiya “Azovstal”dakı hərbçiləri niyə sərbəst buraxmır? - Açıqlama

“Mariupol şəhərinin mühasirəsini hərbi yolla açmaq mümkün deyil. Bu gün bu mümkün deyil. Və biz bu barədə açıq danışdıq. Ukraynanın Mariupolun hərbi yolla kilidini açmaq üçün elə də ağır silahları yoxdur”.

Teleqraf.com xəbər verir ki, bunu Ukrayna prezidenti Vladimir Zelenski Kanadanın baş naziri Castin Trüdo ilə birgə keçirdiyi mətbuat konfransında bildirib.

Zelenski əlavə edib ki, hakimiyyət bu problemi diplomatiya yolu ilə həll etməyə çalışır. “Diplomatik yol ona gətirib çıxarıb ki, bu gün blokada olan “Azovstal” zavodundan dinc sakinlər çıxarılıb”.

“Azovstal” zavodunda mühasirədə olan döyüşçülərə gəlincə, Zelenski vurğulayıb: “Rusiya ordusu, siyasi rəhbərlik bizim hərbçilərimizi azad etmək istəmir”.

Zelenski əlavə edib ki, Türkiyə, İsrail və İsveçrədən danışıqlar aparan şəxslər bu məsələdə kömək etməyə dəvət olunub. Bundan əlavə, Fransa, BMT və Beynəlxalq Qızıl Xaç Komitəsinin rəhbərliyinin nümayəndələri bu məsələni həll etməyə çalışıblar.

“Rusiya ordunu yalnız məhbus olduqları təqdirdə dəyişdirir. Vəziyyət belədir. Bu, Rusiya Federasiyasının cavabıdır. Başqa cavab yoxdur”, - Zelenski bildirib.