Çində etirazlar: 10 yaralı

Honkonqda etirazçılarla polis arasında baş vermiş toqquşmalardan sonra azı 28 nəfər saxlanılıb.

Teleqraf.com-un İTAR-TASS agentliyinə istinadən verdiyi xəbərə görə, iğtişaşlar nəticəsində səkkizi polis olmaqla 10 nəfər xəsarət alıb.

Etiraz aksiyasının iştirakçıları yenidən Koulun yarımadasındakı Monqkok adlı əraziyə keçməyə cəhd ediblər. Üç gün öncə asayiş keşikçiləri adıçəkilən ərazini barrikada və çadır düşərgələrindən təmizləmişdilər. Bu dəfə polis nümayişçiləri dağıtmaq üçün rezin dəyənəklər və gözyaşardıcı qazdan istifadə edib.

Xatırladaq ki, Honkonqda etirazlar sentyabrın 26-dan bəri davam edir. Aksiya iştirakçıları Honkonq administrasiyasının rəhbərinin Pekin tərəfindən müəyyənləşdirilməsini deyil, Honkonq sakinləri tərəfindən seçilməsini tələb edirlər