Türkiyə terrorçulara məxsus obyektləri vurdu

İraqın şimalındakı Metina, Hakurk, Qara, Qəndil və Asos bölgələrində terrorçu qruplara qarşı keçirilən hava əməliyyatı zamanı 22 obyekt məhv edilib, çoxlu sayda terrorçu zərərsizləşdirilib.

Teleqraf.com xəbər verir ki, bu barədə Türkiyə Milli Müdafiə Nazirliyi məlumat yayıb.

Bildirilib ki, oktyabrın 5-i yerli saat 19:00-da BMT Nizamnaməsinin 51-ci maddəsindən irəli gələn özünümüdafiə hüququna uyğun olaraq İraqın şimalındakı Metina, Hakurk, Qara, Qəndil və Asos bölgələrində terror təşkilatlarına qarşı hava əməliyyatı keçirilib.

Məlumata əsasən, əməliyyatın məqsədi mülki əhalini və sərhəd təhlükəsizliyini təhdid edən PKK/KSK terror qruplarını və digər terror ünsürlərini zərərsizləşdirməkdir.

"Hava hücumları nəticəsində separatçı terror təşkilatının istifadə etdiyi və bu təşkilatların yüksək rütbəli üzvlərinin gizləndiyi ehtimal olunan mağara, sığınacaq, bunker, sığınacaq və anbarlardan ibarət 22 obyekt məhv edilib. Həyata keçirilən əməliyyatlar zamanı çoxlu sayda terrorçu zərərsizləşdirilib", - deyə qeyd olunub.