Ukraynaya silah tədarükü dayandırılır – ABŞ-dan gözlənilməz qərar

ABŞ-ın Ukraynaya yardım üçün vəsaiti tükənir, Konqres maliyyələşdirməni təsdiqləməsə, Kiyevə silah tədarükü dayandırıla bilər.

Teleqraf.com xəbər verir ki, bu barədə ABŞ prezidentinin müşaviri Ceyk Sallivan məlumat verib.

“Konqres tədbir görməsə, prezident administrasiyası ilin sonuna qədər Ukraynaya daha çox silah və texnika vermək və öz hərbi hazırlığımıza xələl gətirmədən ABŞ-ın hərbi anbarından silah təmin etmək üçün resursları tükənəcək. Konqresin Ukrayna və digər milli təhlükəsizlik ehtiyacları üçün təmin etdiyi resurslar Rusiyanın Ukraynadakı irəliləyişlərini dayandırdı, Ukraynaya mühüm hərbi qələbələr əldə etməyə kömək etdi, o cümlədən Rusiyanın işğal etdiyi ərazilərin 50 faizdən çoxunu geri qaytardı”, - ABŞ rəsmisi bildirib.

Onun sözlərinə görə, indi hər şey Konqresdən asılıdır.

Sallivan xatırladıb ki, ABŞ-da pul tükənir, vaxt demək olar bitib. O, Konqresi ABŞ-ın milli təhlükəsizliyini gücləndirəcək və Rusiyanın təcavüzünə qarşı mübarizədə Ukraynaya kömək edəcək maliyyə tələbini təsdiqləməyə çağırıb.

“Ukraynaya silah vermək üçün maliyyə yoxdursa, silah ötürməyə davam edə bilmərik”, - Sallivan vurğulayıb.