“Məhv etdik, HƏMAS-dan sonrakı günlər başladı” - Netanyahu

Yəhya Sinvarın öldürülməsi HƏMAS-dan sonrakı günlərin başlanğıcıdır. Amma HƏMAS təslim olmasa və bütün girovları azad etməsə, onun ölümü belə Qəzzada müharibənin sonu olmayacaq.

Teleqraf.com xəbər verir ki, bunu İsrail Baş nazir Benyamin Netanyahu deyib.

İsrail lideri HƏMAS liderinin ölümünün qəzzalılar üçün HƏMAS zülmündən qurtulmaq üçün bir fürsət olduğunu bildirib.

“HƏMAS artıq Qəzzanı idarə etməyəcək. HƏMAS terrorçularına deyirəm: liderləriniz qaçır və onlar məhv ediləcək”, - Netanyahu vurğulayıb.

Baş nazir hesab edir ki, Sinvarın öldürülməsi müharibədə vacib andır.

“Bu müharibə sabah bitə bilər. HƏMAS silahı yerə qoysa və girovlarımızı geri qaytarsa, bu, bitəcək”, - Netanyahu əlavə edəcək.

İsrail lideri Qəzzanın mülki əhalisinə müraciətində bildirib: “Sinvar sizin həyatınızı məhv etdi. Sizi “aslan” adlandırırdı, amma özü qaçıb qaranlıq bir yuvada gizlənmişdi”.

HƏMAS lideri Yəhya Sinvar Qəzza zolağının Rəfah şəhərində İsrail ordusu tərəfindən məhv edilib.