Xırdalandakı faciə ilə bağlı yeni versiya: onlar dəm qazından ölməyiblər, 5 yox, 7 nəfər olublar

Xırdalan şəhərində beş qızın ölümü ilə nəticələnən hadisənin səbəbləri barədə yeni versiya ortaya çıxıb.

Teleqraf.com-un hadisə yerində olan müxbirinin məlumatına görə, həmin mənzildə qızların sayı 5 yox, 7 olub. Onlardan 2-si qonaq gəlibmiş. Hadisə qonaqların gedişindən sonra baş verib.

Qonşular bildiriblər ki, bu gün "JEK" əməkdaşları faciənin baş verdiyi otağın qaz təchizatını yoxlayıblar. Heç bir qaz sızıntısı və ya dəm qazı yaranmasına səbəb olan hal aşkarlanmayıb. Lakin qonşu deyib ki, mənzildə İran peçi olub.

"JEK"-in mühəndisi İmamverdi Sadıqov bildirib ki, qızların dəm qazından yox, qida zəhərlənməsindən öldükləri ehtimalı böyükdür.

Müxbirimiz xəbər verir ki, ölənlərdən 3-ü tələbə, qalan ikisi isə ana və qızıdır. 4-ü çarpayıda, 1-i balkonda ölüb. Bir otaqlı evin yiyəsi rəhmətə gedib, mənzili mərhumun bacısı makler vasitəsilə kirayə verib.

Qeyd edək ki, bu gün Xırdalanda 5 qızın ölümü ilə nəticələnən hadisə baş verib. İlkin məlumatda onların dəm qazından öldükləri bildirilib.

İlhamə Əbülfət
Samir İsayev