Azərbaycanlıların Soyqırımı Günündə silsilə tədbirlər keçiriləcək

Bakı Şəhər Mədəniyyət və Turizm Baş İdarəsinin şəbəkəsinə daxil olan mədəniyyət müəssisələrinin 31 mart – Azərbaycanlıların Soyqırımı Günü ilə əlaqədar tədbirlər planı açıqlanıb. Tədbirlər uşaq musiqi və incəsənət məktəblərində, Heydər Əliyev mərkəzləri və muzeylərdə, mədəniyyət evləri və klublarda, həmçinin kitabxanalarda keçiriləcək.

Baş İdarədən Teleqraf.com-a bildirilib ki, sərgilər, mühazirələr, “dəyirmi masa”lar formasında təşkil olunacaq silsilə tədbirlərdə faciə qurbanlarının xatirələri anılacaq.

Qeyd edək ki, XX əsrin əvvəllərində xalqımıza qarşı açıq şəkildə genişmiqyaslı qanlı aksiyalar həyata keçirməyə başlayan erməni daşnaklarının 1918-ci ilin martında Bakı, Şamaxı, Quba, Qarabağ, Naxçıvan və digər bölgələrdə kütləvi qırğınlar törədərək, on minlərlə soydaşımızı qətlə yetiriblər. Təcavüzkar ermənilərin apardıqları işğalçılıq müharibəsi nəticəsində torpaqlarımızın 20 faizi zəbt edilib, 20 minədək azərbaycanlı şəhid olub, bir milyondan çox həmvətənlimiz doğma torpaqlarından qovulub.