ÜAK Alxanlı təxribatı barədə bəyanat yaydı

Azərbaycanın Qarabağ bölgəsinin dinc əhalisinə qarşı daha bir cinayət iyulun 4-də Ermənistan silahlı qüvvələri tərəfindən Füzuli rayonun Alxanlı kəndində törədilib. Hadisə nəticəsində 1967-ci il təvəllüdlü Sahibə Əliyeva və onun 2 yaşlı nəvəsi Zəhra öldürülüb. Dinc əhaliyə, qadınlara, uşaqlara, qocalara qarşı törədilən bu vəhşilik Ermənistanın dövlət siyasətinin tərkib hissəsidir.

Diasporla İş üzrə Dövlət Komitəsindən Teleqraf.com-a verilən məlumata görə, bu fikirlər Ümumrusiya Azərbaycan Konqresinin bəyanatında əks olunub.

Bəyanatda ermənilər tərəfindən Xocalıda törədilmiş soyqırımına da toxunulub, bu hadisə haqında ətraflı məlumat verilib. Ermənistan prezidenti Serj Sərkisyanın məşhur ifadəsi – “Xocalıya qədər azərbaycanlılar bizə qeyri-ciddi yanaşırdılar, onlar düşünürdülər ki, biz dinc əhaliyə silah qaldırmaq gücündə deyilik. Biz bu stereotipi dağıda bildik” fikrinin bu ölkənin soyqırımı və terror siyasəti yürütdüyünün etirafı olduğu vurğulanıb.