Aşura günü bunu etmək olmaz - Şeyx/Yeni

“Aşura günündə baş yarmaq, zəncir vurmaq olmamalıdır”.

Teleqraf.com xəbər verir ki, bunu jurnalistlərə açıqlamasında Qafqaz Müsəlmanları İdarəsinin (QMİ) sədri Şeyxülislam Hacı Allahşükür Paşazadə qanvermə aksiyasında bildirib.

Onun sözlərinə görə, bu gün ədalətin bərpa edildiyi və şəhidlərin yad olunduğu gündür: “Bütün Azərbaycan və dünya müsəlmanlarına başsağlığı verirəm. artıq illərdir ki, bu gün qanvermə aksiyası keçirilir. Biz qan verməklə başqalarına can veririk. Bununla İmam Hüseyn (s) vəsiyyətinə əməl edirik. Aşura günü baş yarmaq, zəncir vurmaq olmasa yaxşıdır. Buna imam Hüseyn də razı olmazdı”.

QMİ sədri bildirib ki, bu gün Azərbaycanda qəbul edilən fitvalar məhdudiyyət kimi təqdim edilir: “Bizim fitvamızda uşaqlarla bağlı məqamlara da toxunulub. Azərbaycanda bu günün qeyd edilməsi ilə vağlı məhdudiyyət yoxdur. Baxmayaq ki, qəbul etdiyimiz fitvanı məhdudiyyət kimi qəbul edirlər. Lakin Prezident İlham Əliyev dindarlar üçün şərait yaradıb. Keçən il Hacıcavad məscidi tikildi, bu yaxınlarda prezidentlə məsləhətləşdik və Fatimeyi Zəhranın məscidini prezidentin öz vəsaiti hesabına inşa etdirmək istəyirik. Məhərrəmlikdən sonra tikintiyə başlanılacaq. Azərbaycanda başqa dinlərə olan münasibət yüksək səviyyədədir. Kilsələr təmir olunur. Bunlar dini münasibətlərin yüksək olmasının göstəricisidir".

***

12:17

Bu gün Aşura günü ilə əlaqədar Təzəpir məscidində qanvermə aksiyası başlayıb.

Publika.az xəbər verir ki, məsciddə təşkil edilən qanvermə aksiyasına Qafqaz Müsəlmanları İdarəsinin sədri, şeyxülislam Allahşükür Paşazadə də qatılaraq qan verib.

Bundan başqa, Dini Qurumlarla İş üzrə Dövlət Komitəsinin sədri Mübariz Qurbanlı, bir sıra din xadimləri, eləcə də qeyri-islami dini icmaların rəhbərləri də qanvermə aksiyasında iştirak ediblər.

Qeyd edək ki, bu gün Aşura günü ilə əlaqədar paytaxt və rayonlarda əvvəlcədən elan edilmiş ünvanlarda qanvermə aksiyaları keçirilir. Aksiyalar sonuncu müraciətlərə qədər davam etdiriləcək.