Pakistan Azərbaycan müstəqillik qazandıqdan bu günə qədər... - Deputat

Pakistan Azərbaycan müstəqillik qazandıqdan bu günə qədər bütün platformalarda yanımızda olub, haqq işimizi müdafiə edib.

Teleqraf.com xəbər verir ki, bunu parlamentdə çıxışı zamanı deputat Fəzail Ağamalı deyib.

Deputat bildirib ki, istər Birinci Qarabağ savaşında, istərsə də Vətən müharibəsi zamanı Pakistanın Azərbaycana dəstəyinin şahidi olduq:

“Pakistan hökumət başçısı son müharibə zamanı Ermənistanın təcavüzkar siyasətini sərt tənqid etdi. Bu cür münasibətlər, yanaşmalar və müdafiə Azərbaycanın beynəlxalq səviyyədə təklənməsinin qarşısını alır. Mən Pakistan dövlətinə, dövlət başçılarına və xalqına dərin təşəkkürümü bildirirəm. Bundan sonra Pakistanla Azərbaycan arasında bütün səviyyələrdə münasibətlər daha da inkişaf etdirilməlidir. Elə parlamentlər səviyyəsində də bizim qarşılıqlı səfərlərimizin olması müsbət hadisə olardı. Bu, qardaşlıq və dostluğumuzu daha da dərinə aparardı. Hesab edirəm ki, bu, hər iki ölkənin maraqlarına uyğundur”.

F.Ağamalı qeyd edib ki, Azərbaycan Kəşmir məsələsində Pakistanın yanında olub: "Pakistan da qarşılıqlı olaraq Qarabağ məsələsində Azərbaycanın yanında olub".