Kuzey Kıbrıs təmsilçiliyi Bakıda sərgi keçirdi - Foto

Kuzey Kıbrıs Türk Cumhuriyyətinin Azərbaycandakı təmsilçiliyi ümummilli lider Heydər Əliyevin anadan olmasının 100 illik yubileyinə həsr olunmuş sərgi keçirib.

Teleqraf.com xəbər verir ki, tədbirdə çıxış edən Kuzey Kıbrıs Türk Cumhuriyyətinin Azərbaycandakı təmsilçiliyinin rəhbəri Ufuk Arca Turganer qonaqları salamladıqdan sonra sərgi haqqında məlumat verib.

"Təmsilçiliyimizin Təhsil və Mədəniyyət müşaviri Tevfik Ulualın fotolarından ibarət "Ürəyimdə Azərbaycan" adlı sərgimizə xoş gəlmisiniz. Kuzey Kıbrıs Türk Cumhuriyyətinin Azərbaycandakı təmsilçiliyi olaraq müstəqil, müasir və modern Azərbaycanın memarı, ümummilli lider Heydər Əliyevin 100 illik yubileyini taclandırmaq üçün, gözəl ölkə Azərbaycanın fərqli məkanlarından Tevfik Ulualın obyektivinə yansıyan fotoları, təşkil etdiyimiz sərgi ilə qonaqlarımıza təqdim edirik. Ümummilli lider Heydər Əliyevin əziz xatirəsi önündə hörmət və ehtiramla əyilərək, yandırdığı mübarizə məşəlini bu gün böyük uğur və şərəflə daha da irəliyə aparan cənab prezident İlham Əliyev rəhbərliyi altında Can Azərbaycanın daha da inkişaf edərək yüksəlişinə şahid olmaqdan qürur duyuruq. Kuzey Kıbrıs Türk Cumhuriyyəti ilə Azərbaycan arasındakı qardaşlıq münasibətlərində mədəni, sənət, ictimai və idman sahəsi əhəmiyyətli rol oynayır. Can Azərbaycandan yolu keçən hər kəsin qəlbində yaranan sevgi, azərbaycanlıların bizim yaddaşımıza saldığı iz, Azərbaycana bağlılıq və bağımlılıq yaratmaqdadır".

Kuzey Kıbrıs Türk Cumhuriyyətinin Azərbaycandakı təmsilçiliyinin rəhbəri sərgidə dəstəyi olan rəssam Ağdes Bağırzadəyə, Türkiyənin Yunus Əmrə İnstitutunun Bakı nümayəndəliyinin rəhbəri Selçuk Karakılıça da təşəkkür edib.

Qeyd edək ki, sərgidə bir çox ictimai-siyasi şəxslər iştirak ediblər.