"Rembo" ləqəbli Azərbaycan döyüşçüsü komadan ayıldı

Aprel döyüşlərində başından ağır yaralanan "Rembo" ləqəbli tankçı, Goranboya rayonundan olan Razi Cavadov komadan tam ayılıb.

Teleqraf.com xəbər verir ki, bu barədə jurnalist Aqil Aslan məlumat yayıb. O bildirib ki, düşmənin snayper gülləsindən ağır zədə almış yaralı hərbçimiz artıq reanimasiyadan palataya köçürülüb: "Bir aydan çoxdur ki, ata yolu gözləyən uşaqları, ailəsi nəhayət hospitalda Razini görə bilib, onunla söhbət edə ediblər. Ailəsinə, Razi üçün dua edən hər kəsə yaşatdıqları bu sevincə görə Allah bütün həkimlərdən, tibb bacılarından razı olsun. Allah Raziyə şəfa versin!".

Başından ağır yaralanan "Rembo" ləqəbli Razi Cavadov 40 gündən çoxdur ki, koma vəziyyətində idi. Aprel ayında 4 günlük müharibə zamanı düşmən gülləsinə tuş gəlmiş hərbçimiz əvvəlcə Gəncədəki hospitala yerləşdirilmişdi. Ancaq onun vəziyyəti ağır olduğundan bir neçə gün sonra çətinliklə də olsa, Bakıya - Müdafiə Nazirliyinin Mərkəzi Hospitalına gətirilmişdi.