Bakıda oğurluq edən şəxslər həbs edildi

Binəqədi rayon Polis İdarəsinin 43-cü polis bölməsi əməkdaşlarının keçirdikləri əməliyyat-axtarış tədbirləri nəticəsində Bakı şəhər sakini, əvvəllər məhkum olunmuş R.Mirzəyev saxlanılıb.

Onun sentyabrın 5-də rayon ərazisindəki evlərin birindən 200 ABŞ dolları oğurlaması müəyyən edilib.

Bundan başqa, Xətai rayon Polis İdarəsinin 35-ci polis bölməsi əməkdaşlarının keçirdikləri əməliyyat-axtarış tədbirləri nəticəsində sentyabrın 5-də rayon ərazisindəki kafelərin birindən 1300 manat dəyərində pivə aparatı, çəllək və soyuducu oğurlamaqda şübhəli bilinən Cəlilabad rayon sakini, əvvəllər məhkum olunmuş R.Tağıyev saxlanılıb.

Nəsimi rayon Polis İdarəsinin 19-cu polis şöbəsi əməkdaşlarının keçirdikləri əməliyyat-axtarış tədbirləri nəticəsində müxtəlif vaxtlarda rayon ərazisində 2 nəfərin mobil telefonlarını oğurlamaqda şübhəli bilinən Bakı şəhər sakini, əvvəllər məhkum olunmuş C.Kərimov tutulub.

Daha bir neçə oğurluq faktının üstü Suraxanı rayonunda açılıb.

Suraxanı rayon Polis İdarəsinin 31-ci polis bölməsi əməkdaşlarının keçirdikləri əməliyyat-axtarış tədbirləri nəticəsində ötən il mayın 25-də rayon ərazisindəki 1 evdən 3 ədəd samovar, 2 xalça və 300 metr elektrik naqili, cari il fevralın 18-də 1 idarədən 1000 manat dəyərində su mühərriki, martın 3-də isə 1 evdən 610 manat dəyərində inşaat materialları və təmir-tikinti alətləri oğurlamaqda şübhəli bilinən Bakı şəhər sakini M.Ələkbərov saxlanılıb.

Oğurluq etdiyinə görə tutulmuş E.Qocayevin ətrafında Bakı şəhər Baş Polis İdarəsinin Cinayət Axtarışı İdarəsi və Xətai rayon Polis İdarəsinin 34-cü polis şöbəsində araşdırma aparılıb.

Polis əməkdaşları tərəfindən aparılmış əməliyyat tədbirləri ilə onun Nizami rayonu ərazisində 5 nəfərə məxsus velosipedləri oğurlaması müəyyən edilib.