Fermada yanğın: 34 baş iribuynuzlu heyvan tələf oldu

Göyçayda kənd sakininə məxsus fermada yanğın baş verib, 34 baş iribuynuzlu heyvan tələf olub.

Teleqraf.com xəbər verir ki, hadisə gecə saatlarında rayonun Qarayazı kəndi ərazisində qeydə alınıb. Belə ki, 1986-cı il təvəllüdlü Yusif Məmmədova məxsus fermada güclü yanğın başlayıb. Hadisə zamanı fermada, habelə 4 ton ot bağlaması da tamamilə yanıb.

Ümumi sahəsi 150 kvadratmetr olan fermada baş verən yanğının söndürülməsi üçün əraziyə FHN-in Göyçay Dövlət Yanğından Mühafizə Hissəsinin iki avtomobili və canlı qüvvəsi cəlb olunub.

Yanğının hansı səbəbdən baş verdiyi hələ ki, məlum deyil. Faktla bağlı araşdırma aparılır.