"Qarabağ"ın rəqibi çətin durumda: Baş məşqçi istefa verdi

"Qarabağ"ın Avropa Liqasının qrup mərhələsindəki rəqiblərindən olan Portuqaliyanın "Sportinq" klubu baş məşqçi Joze Pezeyrunu istefaya göndərib.

Klubun rəsmi saytı heç bir səbəb açıqlamayıb. Lakin bu addımın ölkə kubokunda "Eştoril"ə 1:2 hesablı məğlubiyyətlə əlaqədar olduğu güman edilir.

Hazırda "şirlər" Portuqaliya Primeyrasında 5-ci, Avropa Liqasında isə 6 xalla 2-ci yerdə gedirlər. "Sportinq" növbəti görüşünü noyabrın 8-də İngiltərə "Arsenal"ına qarşı keçirəcək.

Qeyd edək ki, "Sportinq" sentyabrın 20-də "Qarabağ"la Lissabonda keçirdiyi görüşdə qələbə qazanıb - 2:0. Bu komandalar Bakıda noyabrın 29-da qarşılaşacaqlar.