AFFA klublara 14 gün vaxt verdi

AFFA UEFA-nın yarışlarında iştirak etmək üçün 6 kluba lisenziya verib.

Teleqraf.com-un qurumun saytına istinadən verdiyi məlumata görə, AFFA-nın Lisenziya Komissiyası klubların lisenziyalaşdırılması üzrə qaydalara əsaslanmış müzakirələrdən sonra aşağıdakıları qərara alıb:

1. UEFA-nın klub yarışlarında iştirak etmək üçün aşağıdakı klublara lisenziya verilsin:

- AZAL PFK, "Kəpəz" PFK, "İnter" PİK, "Qarabağ" FK, "Qəbələ" İK, "Neftci" PFK.

2. UEFA-nın klub yarışlarında iştirak etmək üçün aşağıdakı kluba lisenziya verilməsin:

- "Zirə" FK.

3. Premyer Liqa yarışlarında iştirak etmək üçün aşağıdakı klublara lisenziya verilsin:

- "Zirə" FK, Sumqayıt FK.

Növbəti mövsümdə Premyer Liqa yarışlarında iştirak etmək məqsədilə lisenziya almaq üçün müraciət etmiş digər klublar lisenziyalaşdırma üzrə sənədlərini tam şəkildə təqdim etməyib. Bunu nəzərə alaraq, aşağıdakı qərarlar qəbul olunub:

- Klublara çatışmazlıqları aradan qaldırmaq üçün əlavə olaraq 14 gün vaxt verilsin. Sənədlərin AFFA-nın Lisenziyalaşdırma qrupuna təqdim edilməsi üçün son tarix 30 may 2016-cı il müəyyən olunsun;
- Son tarix bitdikdən sonra AFFA-nın Lisenziya Komissiyasının növbəti iclası keçiriləcək və klublar tərəfindən təqdim olunmuş sənədlərə əsaslanaraq müvafiq qərarlar qəbul ediləcək.
- Sənədlərdə olan çatışmazlıqlar müəyyən olunmuş son tarixədək klublar tərəfindən aradan qaldırılmazsa və növbəti mövsüm Premyer Liqada çıxış etmək üçün lisenziya almış klubların sayında yetərsay olmazsa, AFFA-nın Lisenziyalaşdırma Qrupu hesabat hazırlayaraq AFFA-nın İcraiyyə Komitəsinə təqdim edəcək. Bu halda, növbəti mövsümdə Premyer Liqa yarışlarının iştirakçıları ilə bağlı son qərar AFFA İcraiyyə Komitəsi tərəfindən veriləcək.